PAMASS (Paguyuban Mahasiswa Sastra Sunda)

PAMASS (Paguyuban Mahasiswa Sastra Sunda)
Aya hiji ngaran himpunan mahasiswa nu boga ngaran PAMASS, nyaeta Paguyuban Mahasiswa Sastra Sunda. Hiji ngaran nu beda jeung ngaran himpunan jurusan sejen di Fakultas Sastra. Ieu himpunan teh ngabogaan hiji tempat, anu pernahna di Student Centre Lt.1. Kitu nu katulis di kop surat, mun kuring di titah nyieun surat teh. Hiji rohangan nu jadi bagean ti gedong Student Centre Fakultas Sastra. Digigireuana aya rohangan pikeun himpunan mahasiswa Sastra Indonesia nu boga ngaran Gelanggang, di gigir hiji deui rohangan pikeun himpunan mahasiswa Ilmu Sejarah nu boga ngaran HIMSE. PAMASS kiwari kaleungitan imutna nu geus nanjeur sababaraha taun katukang. Lamun urang nilik-nilik ti luar, di belah luhur, aya ngaran, Paguyuban Mahasiswa Sastra Sunda make aksara Sunda jeung laten. Tapi…ayeuna mah aksara teh katingali teu lengkep, aya hurup anu geus maruragan, tungtungna teh mun dibaca matak teu pikagenaheun. Komo ayeuna mah eta ngaran teh geus aya nu nyoplokeun. Ceuk anu nyoplokeun teh: “ngewa katempona ge, daripada teu mernah dibaca, geus we dicoplokeun ganti ku mading nu tulisanana Bahasa Mantra”. Kuring seuri koneng ngadengena ge. Mun ditingali kana jandela, ayeuna mah rada pantes, da basa eta mah, jandela nu deukeut panto teh euweuh kacaan, atuh anginna jigana teh blus blas kaluar kajero. Panto nu matak pikawatireun, teu bogaeun gagang panto, mun muka panto teh atuh ngaluarkeun sagala cara jeung tanaga, da nu teu apaleun trikna mah moal bisaeun muka panto PAMASS. Sup kajero, melengseng bau sagala rupa. Bau dahdir, bau sangu haseum, bau rook jrrd. Ah…pokona mah teu pikabetaheun. Tapi ayeuna mah rada leuheung, aya nu sok meuting di PAMASS jadi rada kaurus, najan bauna mah sakapeung angger we aya. Mun ditingali sakurilingna, tembok atanapi jentrena mah triplek eta teh dihias ku rupa-rupa tulisan nu dilataran ku cet anu mangrupa-rupa warna: hideung, bodas, biru, hejo, jeung warna–warna sejen nu teu puguh warnana. Rupa-rupa tulisan, lolobana mah tulisan silih sepet, da aya nu nyebut majar PAMASS teh Paguyuban Mahasiswa Silih Sepet. Astaghfirullah…ka almamater sorangan nepikeun ka kitu. Bari jeung enya oge ketang. Mun ningali kasakuriling rohangan deui, di jero aya lomari nu manjang ukuranna moal leuwih ti 2x4 meter, loker disebut na teh. Malah mah tiap loker teh dipimilik ku sababaraha urang mahasiswa PAMASS, tapi ayeuna mah tiap loker diaranan pikeun nyimpen kostum teater jeung arsip-arsip PAMASS. Ditembok belah kidul, aya foto susunan kaorganisasian PAMASS entragan 2007, foto Ais Pangampih cenah. Ayeuna mah aya komputer jeung printer, tapi eta komputer teh ngan ukur bisa dipake lalajo alias nyetel DVD jeung maen game wungkul, teu bisa dipake ngagawean kapentingan organisasi mah. Dijuru, aya sababaraha pakakas dapur, magicom jeung galon nu jarang pisan aya caian. Dijuru deui nambru kantong-kantong sababaraha mahasiwa nu sok mondok di dinya. Di tembok atanapi triplek belah kaler, aya tempat samodel mading, nu eusina jiga kotak aspirasi jeung rupa-rupa pengumuman kuliah. Sakapeung mah baju, calana, kolor, anduk ngagarantung tukangeun panto. Matak betah nu ningali (mun panonna loba cileuhan keneh mah).